سندوقی دراوی نێودەوڵەتی: لە کەرتی بانکی و نەختینەیی عێراق پەرەسەندنی زیاتر بەدیدەکرێت

لە راگەیەنراوێکی نێردەی سندوقی دراوی نێودەوڵەتی بڵاوکراوەتەوە، سیاسەتەکانی بانکی ناوەندی عێراق توانیویەتی کۆنتڕۆڵی رێژەی هەڵئاوسان بکات، بە شێوەیەک لە سەرەتای ئەمساڵەوە رێژەی هەڵئاوسان لە کۆماری عێراق 7٪ بوە و لە کۆتایی ساڵ بۆ 4٪ نزمبوەتەوە.

پێشبینی دەکرێت رێژەی هەڵئاوسان لە عێراق سەقامگیری زیاتری پێوەبەدی بکرێت

سندوقی دراوی نێودەوڵەتی ئاماژەی بەوەشکردوە، لە مانگەکانی داهاتو پێشبینی دەکرێت رێژەی هەڵئاوسان لە عێراق سەقامگیری زیاتری پێوەبەدی بکرێت، ئەویش بەهۆی ئەو سیاسەتە نەختینەییە توندەی بانکی ناوەندی لە بەرزکردنەوەی نرخی دینار بەرامبەر بە دۆلار گرتویەتییە بەر.

سیاسەتی ئێستای نەختینەیی هاوکاربوە لە ئیدارەدانی کەرتە نەخینییەکان

بانکی ناوەندی عێراق ئەوە دەخاتەڕو، ئەو سیاسەتە نەختینەییانەی لەمساڵدا پشتی پێبەستراوە بە شێوەیەکی بەرچاو هاوکاربوە لە ئیدارەدانی کەرتی نەختینەیی ناوخۆیی بە شێوەیەکی باش، هەروەها سەرنجی نێردەی سندوقی دراوی نێودەوڵەتی راکێشاوە.

ئامانجمانە پەرە بە چاکسازییە بانکییەکانی ئێستا بدەین

باسی لەوەشکردوە، بانکی ناوەندی هەوڵ دەدات بازاڕی ئاڵوگۆری نێوان بانکەکان پەرەپێبدات، ئەویش بە ئامانجی پتەوکردنی کردەوەی گواستنەوەی کاریگەری سیاسەتی نەختینەیی، هەروەها چاکسازییە بانکییەکانی ئێستا و پەرەپێدانی سیستمی پارەدانی ئەلیکترۆنی بە هەماهەنگی لەگەڵ حکومەتی بەغدا، لە پێویستییە سەرەکییەکانی دابینکردنی پشتیوانی چالاکردنی کەرتی تایبەت و پتەوکردنی گەشەپێدانی ئابوری دادەنرێت.

نرخی بەرمیلێک نەوتی خاوی برێنت بەڕێژەی 22 سەنت کە دەکاتە 0.3% دابەزیوە و گەیشتوەتە 79.65 دۆلار، هاوکات نرخی بەرمیلێک نەوتی خاوی ڕۆژئاوای تەکساسی ئەمریکیش گەیشتوەتە 74 دۆلار، کە بەهەمانشێوە 22 سەنت کە دەکاتە 0.3% دابەزیوە.

نیگەرانییەکان سەبارەت بە دابەزینی خواست لەدوای زیادبونی لەناکاوی کۆگاکانی نەوتی خاوی ئەمریکا زیاتر بو

نیگەرانییەکان سەبارەت بە دابەزینی خواست لەدوای زیادبونی لەناکاوی کۆگاکانی نەوتی خاوی ئەمریکا زیاتر بو ئه‌وه‌ش جگه‌ لە نیگەرانییەکان سەبارەت بە پەککەوتنی بازرگانی جیهانی بەهۆی گرژییەکانی رۆژهەڵاتی ناوەڕاست.

مەترسی هەیە و هاتوچۆی کەشتییە نەوتییەکان سنوردارە تا ئەوکاتەی گەروی هورموز سەلامەت بێت

سۆیۆشی ئۆینۆ، شرۆڤەکاری بازاڕە داراییەکانی سەر بە کۆمپانیای ئێن ئێڵ ئای رێسێرچ، باسی له‌وه‌كردو، “مەترسی هەیە و هاتوچۆی کەشتییە نەوتییەکان سنوردارە تا ئەوکاتەی گەروی هورموز سەلامەت بێت، کە رێڕەوەی گواستنەوەی نەوتی بەشێکی زۆری بەرهەمهێنەرە نەوتییەکانی کەنداوە”.