په‌رله‌مانتارێك: به‌رزبونه‌وه‌ی دۆلار به‌رامبه‌ر به‌دینار راده‌گیرێت

مزڕ كه‌ڕوی ئه‌ندامی لیژنه‌ی دارایی له‌ په‌رله‌مانی عێراق رایگه‌یاند، كردنه‌وه‌ی باره‌گای بانكه‌ نێوده‌وڵه‌تییه‌كان، جا عه‌ره‌بی بێت یان بیانی، له‌ به‌غدا و پارێزگاكانی دیكه‌ حاڵه‌تێكی ئه‌رێنییه‌ و له‌ هه‌مو وڵاتانی جیهاندا بونی هه‌یه‌، له‌ چوارچێوه‌ی كراوه‌یی و ڕاكێشانی وه‌به‌رهێنان و بنیادنان دێت، به‌تایبه‌ت له‌ڕوی ژێرخانی جیهانی دارایی له‌ ده‌سته‌به‌ركردنی پابه‌ندبونی كۆمپانیاكان، وه‌رگرتنی مافه‌كانیان، گواستنه‌وه‌ی پاره‌، جا چ بۆ وه‌به‌رهێنان بێت یان دروستكردنی پڕۆژه‌ی نوێ بێت.

به‌رزبونه‌وه‌ی به‌های دۆلار و دابه‌زینی به‌های دیناری عێراقی، ڕه‌هه‌ند و هۆكاری دیكه‌ی هه‌یه‌

ئاماژه‌ی به‌وه‌شكرد، “به‌رزبونه‌وه‌ی به‌های دۆلار و دابه‌زینی به‌های دیناری عێراقی، ڕه‌هه‌ند و هۆكاری دیكه‌ی هه‌یه‌ كه‌ هه‌ندێكیان ناوخۆیین و هه‌ندێكی دیكه‌یان ده‌ره‌كین”.

لیژنه‌ی دارایی له‌گه‌ڵ به‌رپرسانی بانكی ناوه‌ندی میكانیزمه‌كانی خۆی بۆ كۆنتڕۆڵكردنی بازاڕه‌كانی ناوخۆ خستۆته‌ڕو

ئه‌وه‌شیخسته‌ڕو، له‌م دواییانه‌دا لیژنه‌ی دارایی له‌گه‌ڵ به‌رپرسانی بانكی ناوه‌ندی میكانیزمه‌كانی خۆی بۆ كۆنتڕۆڵكردنی بازاڕه‌كانی ناوخۆ و سنورداركردنی به‌رزبونه‌وه‌ی به‌های دۆلار به‌رامبه‌ر به‌دینار تاوتوێكردوه‌، كۆمه‌ڵێك ڕێوشوێن هه‌ن كه‌ ده‌گیرێنه‌به‌ر بۆ تێپه‌ڕاندنی هه‌ندێك له‌ ئاسته‌نگه‌كان.

ئه‌و په‌رله‌مانتاره‌ ئاشكراشیكردوه‌، “ناكرێت كێشه‌ی دۆلار بخرێته‌ ئه‌ستۆی بانكه‌ بیانییه‌كان، به‌ڵكو به‌كارهێنانی نه‌خشه‌ڕێگایه‌كی شه‌فاف بۆ ڕێگریكردن له‌ قاچاخچه‌ییه‌كه‌ی زۆرترین كاریگه‌ری ده‌بێت تا دۆلار كۆنتڕۆڵ بكرێت”.

مزڕ كه‌ڕوی ده‌شڵێت، “لیژنه‌ی دارایی هه‌ڵسه‌نگاندنێكی گشتگیری هه‌یه‌ بۆ دۆخی دراو و دارایی وڵات و مامه‌ڵه‌ له‌گه‌ڵ ئاسته‌نگه‌كاندا ده‌كات، گۆڕینی هه‌ندێك له‌ میكانیزمه‌كانی بانكی ناوه‌ندیش به‌ كه‌مكردنه‌وه‌ی خواست له‌سه‌ر دۆلار له‌ قۆناغی داهاتودا ده‌بێته‌ كاری له‌پێشینه‌”.